Kuch aisa karde mere kirdigaar aankhon mai
Hamesha naqsh rahe ru e yaar Aankhon mai
Na kaise ye gul o Gunche hon khwaar Aankhon mai
Base huwe hain madeene ke khaar Aankhon mai
Wo noor de mere parwardigaar Aankhon mai
Ke jalwah gar rahe rukh ki bahaar Aankhon mai
Basar ke saath baseerat bhi khoob raushan ho
Lagaaun khaak e qadam baar baar Aankhon mai
Tumhare qadmon pe moti nisaar hone ko
Hain beshumaar meri ashkbaar Aankhon mai
Unhein na dekha to kis kaam ki hain ye Aankhein
Ke dekhne ki hai saari bahaar Aankhon mai
Kuch aisa karde mere kirdigaar aankhon mai
Hamesha naqsh rahe ru e yaar Aankhon mai
Nazar mai kaise samaayenge phool jannat ke
Ke bas chuke hain Madine ke khaar Aankhon mai
Ajab nahin ke likha loh ka nazar aaye
Jo naqsh e paa ka lagaaun gubaar Aankhon mai
Ye dum hamara koi dum ka aur mehmaan hai
Karam se lijiye dum bhar qaraar Aankhon mai
Ye gul ye gunche ye gulshan ke bel aur bute
Unhin ke dum ki hai saari bahaar Aankhon mai
Ye dil tadap ke kaheen aankhon mai na aajaye
Ke phir raha hai kisi ka mazaar Aankhon mai
Kuch aisa karde mere kirdigaar aankhon mai
Hamesha naqsh rahe ru e yaar Aankhon mai
Karam ye mujh pe kiya hai mere tasawwur ne
Ke aaj kheench di tasweer e yaar Aankhon mai
Farishto poochhte ho mujh se kis ki ummat ho
Lo dekh lo ye hai tasweer e yaar Aankhon mai
Ye kya sawaal hai mujh se ke kis ka banda hai
Main jis ka banda hoon hai noor baar Aankhon mai
Piya hai jaam e mohabbat jo aap ne Noori
Hamesha us ka rahega khumaar Aankhon mai
Kuch aisa karde mere kirdigaar aankhon mai
Hamesha naqsh rahe ru e yaar Aankhon mai
کچھ ایسا کردے مرے کردگار آنکھوں میں
ہمیشہ نقش رہے روئے یار آنکھوں میں
نہ کیسے یہ گل و غنچے ہوں خوار آنکھوں میں
بسے ہوئے ہیں مدینے کے خار آنکھوں میں
بسا ہوا ہے کوئی گل عذار آنکھوں میں
کھلا ہے چار طرف لالہ زار آنکھوں میں
ہوا ہے جلوہ نما گل عذار آنکھوں میں
خزاں کے دور میں پھولی بہار آنکھوں میں
سرور و نور ہو دل میں بہار آنکھوں میں
جو خواب میں کبھی آئے نگار آنکھوں میں
وہ نور دے مرے پروردگار آنکھوں میں
کہ جلوہ گر رہے رخ کی بہار آنکھوں میں
نظر ہو قدموں پر ان کے نثار آنکھوں میں
بنائیں اپنا ہوں وہ رہ گزار آنکھوں میں
نہ اک نگاہ ہی صدقہ ہو دل بھی قرباں ہو
کرم کرے تو وہ ناقہ سوار آنکھوں میں
بصر کے ساتھ بصیرت بھی خوب روشن ہو
لگاؤں خاک قدم بار بار آنکھوں میں
تمہارے قدموں پہ موتی نثار ہونے کو
ہیں بے شمار مری اشکبار آنکھوں میں
نظر نہ آیا قرار دل حزیں اب تک
نگاہ رہتی ہے یوں بے قرار آنکھوں میں
انہیں نہ دیکھا تو کس کام کی ہیں یہ آنکھیں
کہ دیکھنے کی ہے ساری بہار آنکھوں میں
نظر میں کیسے سمائیں گے پھول جنت کے
کہ بس چکے ہیں مدینے کے خار آنکھوں میں
عجب نہیں کہ لکھا لوح کا نظر آئے
جو نقش پا کا لگاؤں غبار آنکھوں میں
ملے جو خاک قدم ان کی مجھ کو قسمت سے
لگاؤں سرمہ نہ پھر زینہار آنکھوں میں
مدینہ جان چمن اور خزاں سے ایمن ہے
لگائے خاک وہاں کی ہزار آنکھوں میں
کھلے ہیں دیدۂ عشاق خواب مرگ میں بھی
کہ اس نگار کا ہے انتظار آنکھوں میں
خزاں کا دور ہوا دور وہ جہاں آئے
ہوئی ہے قدموں سے ان کے بہار آنکھوں میں
یہ اشتیاق تری دید کا ہے جان جہاں
دم آگیا ہے دم احتضار آنکھوں میں
یہ آسمان کے تارے یہ نرگس شہلا
ترا ہی جلوہ ہے ان بے شمار آنکھوں میں
یہ دم ہمارا کوئی دم کا اور مہماں ہے
کرم سے لیجئے دم بھر قرار آنکھوں میں
وہ سبز سبز نظر آرہا ہے گنبد سبز
قرار آگیا یوں بے قرار آنکھوں میں
بہار دنیا ہے فانی نظر نہ کر اس پر
ہے کوئی دم کی یہ ساری بہار آنکھوں میں
یہ گل یہ غنچے یہ گلشن کے بیل اور بوٹے
انہیں کے دم کی ہے ساری بہار آنکھوں میں
یہ حال زار ہے فرقت میں تیرے مصنطر کا
کہ اشک آتے ہیں بے اختیار آنکھوں میں
وہی مجھے نظر آئیں جدھر نگاہ کروں
انہیں کا جلوہ رہے آشکار آنکھوں میں
یہ دل تڑپ کے کہیں آنکھوں میں نہ آجائے
کہ پھر رہا ہے کسی کا مزار آنکھوں میں
نہ ایسے پھول کھلے ہیں کبھی نہ آگے کھلیں
بہاروں میں ہے عرب کی بہار آنکھوں میں
قریب ہے رگ گردن سے پر جدا ہے وہ
نہ یار دل میں مکیں ہے نہ یار آنکھوں میں
یہ قرب اور یہ دوری خدا کی قدرت ہے
کہ ہوگا خلد میں دیدار یار آنکھوں میں
کرم یہ مجھ پہ کیا ہے مرے تصور نے
کہ آج کھینچ دی تصویر یار آنکھوں میں
فرشتو پوچھتے ہو مجھ سے کس کی امت ہو
لو دیکھ لو یہ ہے تصویر یار آنکھوں میں
نہ صرف آنکھیں ہی روشن ہوں دل بھی بینا ہو
اگر وہ آئیں کبھی ایک بار آنکھوں میں
ہزار آنکھیں ہیں تاروں کی اک گل مہتاب
یہ ایک پھول ہے جیسے ہزار آنکھوں میں
یوں ہی ہیں ماہ رسالت بھی سب نبیوں میں
کرور آنکھوں نہیں بے شمار آنکھوں میں
یہ کیا سوال ہے مجھ سے کہ کس کا بندہ ہے
میں جس کا بندہ ہوں ہے نور بار آنکھوں میں
ہے آشکار نظر میں جہاں کی نیرنگی
جما ہے نقشۂ لیل و نہار آنکھوں میں
جما ہوا ہے تصور میں روضۂ والا
بسے ہوئے ہیں وہ لیل و نہار آنکھوں میں
نہار چہرۂ والا تو گیسو ہیں والیل
بہم ہوئے ہیں یہ لیل و نہار آنکھوں میں
پیا ہے جام محبت جو آپ نے نوریؔ
ہمیشہ اس کا رہے گا خمار آنکھوں میں